Қазақ бапкерлері мен төрешілері Абу-Дабиде өткен джиу-джитсуды дамыту бағдарламасына қатысты
2024 жылғы 11-15 желтоқсан аралығында Абу-Дабиде Азия Олимпиадалық кеңесі (АОК) мен Азия джиу-джитсу одағы (JJAU) ұйымдастырған джиу-джитсуды дамыту бойынша алғашқы бағдарлама өтті.
Алматы, NEGE. Қазақстан Ұлттық Олимпиадалық комитетінің қолдауымен бұл іс-шараға қазақстандық бапкерлер мен төрешілер қатысып, бүкіл Азиядан барған әріптестерімен тәжірибе алмасу және біліктіліктерін арттыру мүмкіндігіне ие болды.
Қазақстан атынан бапкерлер Нұржан Арапбаев пен Риза Сабитова, сондай-ақ төрешілер Елеукен Бекмұхаммед пен Әйгерім Қуатқызы қатысты. Олардың бұл шарадағы белсенділігі еліміздегі джиу-джитсуды дамытуға және спорт саласындағы халықаралық байланыстарды нығайтуға үлкен үлес қосты.
Шейх Фатима бинт Мубарак академиясында өткен бағдарлама кәсіби дағдыларды дамытуға және джиу-джитсу саласында олимпиадалық құндылықтарды енгізуге бағытталды. Әділ ойын, спортшылардың шеберлігін арттыру және спорт қауымдастығының дамуына үлес қосу сынды аспектілерге ерекше назар аударылды.
Қазақстандық мамандардың бұл шараға қатысуы олардың кәсіби стандарттарды жетілдіруге және елдегі спорт мәдениетін нығайтуға деген ұмтылысын айқындады. Бұл бағдарлама АОК-нің Азия аймағындағы джиу-джитсуды жаңа деңгейге көтеру мақсатын жүзеге асырудағы маңызды қадам болды.
Бағдарлама 13-15 желтоқсан аралығында өткен Шейх Халед бен Мұхаммед бен Заедтің джиу-джитсу чемпионатымен тұспа-тұс келді. Бұл қатысушыларға әлемдік деңгейдегі жарыстарды тамашалап, ерекше тәжірибе жинауға мүмкіндік берді.
Айта кету керек, Қазақстанның осындай бастамаларға қатысуы ұлттық джиу-джитсу федерацияларының беделін арттырып, болашақ спортшылар буыны үшін оң мұра қалдыруға негіз болады.
