Қайтыс болған азаматтың ағзалары донорлыққа берілді
Донорлық ағзалардың «Күту парағында» 4300-ден астам адам, олардың ішінде 120-дан астам бала бар.
Алматы, NEGE. Солтүстік Қазақстан облысының көпбейінді облыстық ауруханасында қайтыс болғаннан кейін 1985 жылы туғанқазақстандықтың ағзалары донорлыққа берілді. Отбасының келісімінің арқасында жүрек, бауыр және екі бүйрек алынды.
Денсаулық сақтау министрлігінің мәліметінше, донорлық процесті ҰҒОО және UMC транспланттау бригадаларының, өңірлік үйлестірушілердің және барлық қажетті қызметтердің қатысуымен Трансплантаттауды үйлестіру және жоғары технологиялық медициналық қызметтер республикалық орталығы ұйымдастырды.
«Полиция қызметкерлері маңызды рөл атқарды, олар жедел әрекет етіп, облысқа кеткен дәрігерлер мен мамандарды алып жүруді қамтамасыз етті. Бұл жағдай донор отбасының шешімімен бірге үйлестірушілердің, медицина қызметкерлерінің және мемлекеттік қызметтердің үйлесімді жұмысы ғана Қазақстанда жүздеген пациенттердің өмір сүруіне мүмкіндік беретінін айқын көрсетті», - делінген ДСМ хабарламасында.
Министрлік мәліметінше, донорлық ағзалардың «Күту парағында» 4300-ден астам адам, олардың ішінде 120-дан астам бала бар.
