Қайрат Сатыбалдының ұлына тиесілі болған базарды арзанырақ сатып көрмек
Алматыдағы «Байсат» базарын сатып алуға ешкім ниет білдірмегендіктен, енді оны төмендетілген бағамен сатуға тырысып жатыр.
Астана, NEGE. 18 қарашаға жоспарланған аукцион өтпей қалды. E-qazyna порталындағы мәліметке қарағанда, аукцион басталар кезде бұл нысанды сатып алу үшін ешкім тіркелмеген. Сол кезде нысанды кемінде 28 млрд 639 млн теңгеге сатпақ болған.
Сауда сәтсіз аяқталғаннан кейін бастапқы баға шамамен 2 млрд теңгеге төмендетілді. Енді базарды 26 млрд 706 млн теңгеге сатып алуға болады.
Еске сала кетейік, 2024 жылдың қаңтарында Алматы прокуратурасы Қайрат Сатыбалдының ұлы Бауыржан Нұрсұлтанға тиесілі «Байсат» базарының бөлігін мемлекетке қайтарғанын хабарлаған. Сол кезде жалпы ауданы 4 221,4 шаршы метр болатын үш нысан мен 1,4 гектар жер телімі «КазГерСтрой бірлескен кәсіпорны» және «Astana Finansial Group» атты аффилиирленген компаниялардың меншігінде болған.
