Қайрат Сатыбалды ұзақ уақыттан кейін алғаш рет ел алдына шықты

Астана, NEGE. Ол Қорғаныс министрлігіне қарасты Бауыржан Момышұлы атындағы әскери-спорт колледжінде курсанттармен кездесіп, ескерткішке гүл қою рәсіміне қатысты, деп жазады «Адырна» порталы.

Басылым мәліметінше, іс-шараның видеосын колледж өзінің әлеуметтік желідегі парақшасында жариялаған. 

Қайрат Сатыбалды – осы колледждің түлегі.

Еске салсақ, бұрынғы президент Нұрсұлтан Назарбаевтың немере інісі және Ұлттық қауіпсіздік қызметінің экс-қызметкері Қайрат Сатыбалды 2022 жылы аса ірі көлемде қаржы жымқыру және сеніп тапсырылған мүлікті иемдену күдігімен ұсталды. Кейін сот оны кінәлі деп танып, мүлкін тәркілеп, алты жылға бас бостандығынан айыру жазасын тағайындады.

Алайда 2024 жылы оның жазасы жеңілдетіліп, жазаның өтелмеген бөлігі 3 жыл 3 ай 7 күн мерзімге бас бостандығын шектеу жазасына ауыстырылды. Сондай-ақ ол Қазақстан халқынан, сондай-ақ Мемлекет басшысынан кешірім сұрады.