ҚМА: Қайырымдылық атын жамылған қаржы пирамидасы әшкере болды
Қаржылық мониторинг агенттігі Қарағанды облысында жалғызбасты аналарға, көпбалалы және аз қамтылған отбасыларға көмек көрсетеміз деген «Үміт Самғау» ұйымының заңсыз әрекетін әшкереледі.
Астана, NEGE. Агенттік ақпаратынша, компания өз қызметін қайырымдылық жобасы түрінде көрсеткен.
«Азаматтарға салған қаражатының 300%-дан 800%-ға дейін табыс әкелетіні жөнінде уәде беріліп, әртүрлі «салым түрлері» ұсынылған. Жоба шарттары бойынша – салым көлемі неғұрлым жоғары болса, табыс та соғұрлым көп болатыны айтылған. Қатысушыларға төлемдер нақты кәсіпкерлік қызмет есебінен емес, жаңа салымшылардың қаражаты есебінен жүргізілген», – деп хабарлады ҚМА.
Схемаға ұйымдастырушының туыстары мен таныстары «дропперлер» ретінде тартылған, олардың атына тіркелген банктік карталары мен шоттарына салымшылардың ақшасы қабылданған.
Нәтижесінде 400-ден астам азамат тартылып, жиналған қаражаттың жалпы көлемі 100 млн теңгеден асқан.
Сот санкциясымен күдіктінің пәтері мен автокөлігіне тыйым салынды. Қазір тергеу жұмыстары жүріп жатыр.
