Каспий жағалауынан жүзге жуық итбалықтың өлексесі табылды
Бұл жөнінде Ауыл шаруашылығы министрлігіне қарасты Балық шаруашылығы комитеті хабарлады.
Астана, NEGE. Ведомство мәліметінше, Каспий теңізінің Маңғыстау облысы Түпқараған ауданы аумағындағы жағалауын мониторингілеу кезінде 97 итбалықтың өлексесі табылған.
Жұмыс тобын құру, өлі итбалықтардан сынама алу, оның себебін анықтау, сондай-ақ өлекселерді жою жұмыстарын ұйымдастыру үшін оқиға орнына инспекторлар мен жергілікті билік өкілдері барған.
Гидробиология және экология институты қызметкерлерінің пікірінше, итбалықтар бір айдан астам уақыт бұрын өлген, алайда оларды Маңғыстау облысының Түпқараған ауданы жағалауына тек қазір ғана батыстан соққан дауыл алып шыққан.
Қазіргі уақытта жағалауда тексеру жұмыстары жүргізіліп жатыр.
Айта кетейік, бұған дейін Каспий жағалауынан бірнеше аққудың өлексесі табылған еді. Режиссер Қанат Майлыбаевтың мәлімдеуінше, олардың арасында жақында ғана өлгендері де, жағалауда біраз уақыттан бері жатқан құстар да болған.
