Каспий жағалауынан 80-нен астам итбалықтың өлексесі табылды

Алматы, NEGE. Бұл деректі полиция тіркеп, тергеу жұмыстары басталғанын мәлімдеді.

«Қазгидромет» мәліметінше, Каспий теңізінің акваториясында соңғы уақытта батыс бағыттағы желдер басым болған. Осы желмен 88 итбалықтың өлексесі жағалауға айдалып келген.

Ал Гидробиология және экология институтының хабарлауынша, табылған өлекселердің шіру дәрежесі тым жоғары – бұл жағдай олардың сынамасын сапалы түрде алуға кедергі келтіріп отыр. Соның салдарынан токсикологиялық немесе патологоанатомиялық зерттеу жүргізу мүмкін емес.

Жануарлардың өлу себебін нақты анықтау қиын. Себебі олардың өлгеніне шамамен 2–3 апта өткен. Осы аралықта тіндердің ыдырауы қатты жүріп кеткен, – деп мәлімдеді Ауыл шаруашылығы министрлігінің Балық шаруашылығы комитеті.

Өлі итбалықтардың денесі Түпқараған ауданындағы арнайы полигонда жойылған.