Қасым-Жомарт Тоқаев қазақстандықтарға үндеу жасады
Мемлекет басшысы Қасым-Жомарт Тоқаев Саяси қуғын-сүргін және ашаршылық құрбандарын еске алу күніне байланысты үндеу жасады.
Астана, NEGE. Президент қазақстандықтар 31 мамырда өткен ғасырдың алғашқы жартысындағы саяси қуғын-сүргін құрбандарының рухына тағзым ететінін атап өтті.
«Оларды жадымызда сақтау, заңдылық қағидаты мен әділдік құндылықтарына адал болу – біздің қастерлі борышымыз», – деді Тоқаев.
Президенттің сөзінше, Қазақстанда барша азаматтың құқықтары мен бостандықтарын жан-жақты қорғау үшін жүйелі түрде жағдай жасалып жатыр.
«Мемлекетіміздің осы міндеті 15 наурыздағы жалпыұлттық референдум кезінде қабылданған Конституцияда заң жүзінде бекітілді. Біз бір қоғам болып, озық ойлы ел құру жолына бет бұрдық. Бұл – елімізде Әділдік, Заңдылық, Отаншылдық, Еңбекқорлық, Табиғатқа сүйіспеншілік қағидаттары айрықша маңызға ие болады, сондай-ақ, ғылымды, жоғары технологияларды, мәдениетті және еріктілер қозғалысын дамытуға баса мән беріледі деген сөз», – деп атап өтті Мемлекет басшысы.
1918–1920 жылдардағы азаматтық соғыстан кейін басталған саяси репрессиялар Қазақстан халқы үшін ауыр зардаптарға әкелді. Ресми деректер бойынша, 1921–1954 жылдар аралығында 100 мыңға жуық адам «саяси баптар» бойынша сотталып, олардың 25 мыңы ату жазасына кесілген. Қуғын-сүргін әсіресе қазақ зиялылары мен елдің интеллигенциясына ауыр тиді. Бұл көрсеткіштер – тек ресми сандар.
Сол жылдары жүргізілген жаппай ұжымдастыру мен күштеп отырықшыландыру саясаты да халқымызға үлкен қайғы әкелді. 1930–1933 жылдардағы ашаршылық салдарынан миллиондаған адам қаза тауып, аман қалғандары босқын болып, туған жерін тастап кетуге мәжбүр болды. Бұл қазақ халқының демографиялық және рухани дамуына орасан зиян келтірді.