Қашаған кенінде жаңа каналдар пайда болады
Жаңа каналдардың ұындығы 56 шақырымды құрамақ. Каспий теңізіндегі су деңгейі төмендегендіктен, қазіргі жасанды аралдарға кеме қатынасын канал арқылы жүргізу керек болады.
Осыған қатысты Солтүстік Каспий жобасының операторы «Норт Каспиан Оперейтинг Компани Н.В.» компаниясы (NCOC) Жайық-Каспий Орхус орталығымен бірлесіп, қоғамдық тыңдау өткізді деп жазады, NCOC баспасөз-қызметі.
Ұсынылған жобада Каспий теңізі деңгейінің төмендеуіне және Қашаған кен орнының теңіз нысандары аумағында теңіздің таяздануына байланысты қолданыстағы жасанды аралдарға кірме арна төсеу қажеттігі туындайтындығы қарастырылады. Теңіз операцияларын қолдау жасанды аралдарға персоналды, отынды, жабдықты, химиялық реагенттерді, тамақ өнімдерін және өндіріс пен тіршілік әрекетін қолдау үшін қажетті басқа да материалдарды жеткізетін кемелер арқылы жүзеге асырылатыны белгілі. Жобада аралдарда және олардың айналасында теңіз кемелерінің навигациясын қамтамасыз ету үшін құрылыс мен техникалық қызмет көрсету жұмыстары анықталады. Техникалық қызмет көрсету жұмыстары теңіз түбін қалпына келтіру мен теңіз логистикасы үшін қолайлы жағдайлар жасауды қамтиды.
Теңіз түбіне барынша аз әсер ететін ең заманауи жабдықты пайдалану, сондай-ақ үйінділер учаскелерінің ұзақ мерзімді тұрақтылығын қамтамасыз ету мүмкіндігі арқасында жобаны техникалық тұрғыдан жүзеге асыруға болатындығы анықталды.
Ережеге сәйкес, қоғамдық тыңдау туралы хабарлама 20 жұмыс күні бұрын жарияланды. Жоба материалдарымен Атырау облысы әкімдігінің www.atyrau.gov.kz сайтынан танысуға болады.
