Қаржы министрлігі салықты кепілсіз бөліп төлеуге рұқсат бермек
Қазақстан Республикасының Қаржы министрлігі қаржылық қиын жағдайға тап болған тұлғаларға салықты кепілсіз бөліп төлеу рәсімін жеңілдететін жоба әзірледі.
Астана, NEGE. Жобадағы басты жаңалық 1500 АЕК-ке дейінгі (2026 жылы 6 487 500 теңге) салықтық береше бойынша мүлік кепілі мен банктік кепілдік талаптарын алып тастау болмақ.
Құжатта жоба «салықтық берешегі бар және уақытша қаржылық қиындықтарды бастан өткеріп жатқан салық төлеушілерді» қолдауға бағытталғаны айтылған.
Бұған дейін салықты бөліп төлеу рәсімі салықтық әкімшілендірудегі ең күрделі процестердің бірі саналып келген. Көп жағдайда кепілді бағалау мен сақтандыру шығындары өсімпұлмен шамалас болатын, сондықтан бұл құрал шағын компаниялар үшін тиімсіз болды.
Бұйрық жобасы 19 наурызға дейін ашық талқылау үшін «Ашық НҚА» порталында жарияланды.