Біз «хуторскийміз» деді – Қаржаубай Нұрымов сотта болған оқиғаны баяндап берді

Алматы, NEGE. Түске дейінгі сот отырысында Шерзат Полаттың әжесі Жұмабике Кадирова мен анасы Гүлбара Бишімбиевадан жауап алынды. Түстен кейінгі сот отырысында әкесі Қаржаубай Нұрымов куәлік етіп жатыр. 

Қаржаубай Нұрымов прокурордың сұрақтарына жауап бере отырып, сол күнгі оқиғаны баяндап берді. 

• Тақырыпқа орай: «Аузыңды жап, қазір сені де өлтіреміз деді» – Марқұм Шерзаттың анасы қылмыс болған күнгі оқиғаны айтып берді

«Дүкенді жалға алғанбыз, иесі – көршіміздің туысы. Ол дүкенде көбіне сатушы істеді, артынан жолдасым, бауырларым кезектесіп істедік. Тек етте ғана Нұрғанат тұрды. Ал Шерзат жазда Нұрғанатқа көмектесіп жүрді. Дүкенді түнгі 11.00-ге дейін ашатынбыз, бірақ кейде түнгі сағат 1-2-ге дейін сауда болып кетеді. Кейде ғана осылай болатын, нақты бір уақыты жоқ. Кешкі уақытта мен, кейде бауырларым, кейде жолдас балам отыратын. Ол дүкенде біз қосымша табыс ретінде жұмыстан тыс уақытта істедік. Қазанның 3-нен 4-не қараған түні дүкенде мен сауда жасадым, жұмыстан келіп көмектесейін деп ойладым. Кейін сол уақытта Әскентай Дархан келді. Екеуміздің арамызда ешқандай ұрыс-керіс болған жоқ. Кейін 1-2 ер адам келді. Олар қашан аштыңыздар, не болды, қалай болды деп дүкен жайлы сұрады. Кейін біздің таныс жігіт келді. Дархан сол аралықта сыра сұрады. Кейін мен оған сағат 23.00-ден кейін сыра сатпаймыз деп ескерту жасадым. Ол өтініп қоймағаннан кейін мен сұраған сырасын бердім. Екеуміздің арамыздағы түсінбеушілік ақша аударғанда болды. Ол What's up мессенджері арқылы Қалтаевадан ақша түсті деп көрсетті, мен Светланадан түсті дедім. Ол өзі соны түсінген жоқ. Мен «бауырым айып етпе, соңғы төлем Светланадан түсті», дедім. Сол кезде жақсы сөйлесіп, шығып кеткен», – деді Қаржаубай Нұрымов. 

Пркурор сол күні Дархан Әскентайдың дүкенге кірген кезде мас күйде болған-болмағанын анықтады.

«Мас болды. Қасыма келіп сөйлегенде алкогольдің иісі шығып тұрды. Сол себепті мен онымен көп сөз таластырмай, жібере салғым келді. Сырасын, темекісін алды, мен оған қалған ақшасын қайтардым. Сөйтіп, қол алысып шығарып салдым. Сол уақытта марқұм балам Шерзат келді. Ол дүкенге телефон қуаттандырғышын ұмытып кеткен болатын. Мен оған кештетіп неге жүрсің дедім. Ол: «Ахмет оқуға кетеді, соны шығарып салайық. Кейін сусын алып, балаларды шығарып, үйге барамыз» деді. Мен рұқсатымды бердім. Сол кезде Дархан (Әскентай) қайта айналып кірді. Сол кезде Шерзат Дарханның маған телефонын беріп жатырюп дұрыс сөйлемей тұрғанын түсініп  қалады. Ішіп алған адам боқтық сөз қосып сөйлейді ғой. Дархан далаға шықты, артынан балам шықты. Кассаның жанындағы терезе ашық болатын. Терезеден екеуінің жоғары тонда сөйлесіп тұрғанын естіп қалдым. Сөйтіп мен артынан айналып бардым, мен шығып үлгергенше, бала оны ұрып жіберді. Мен екеуін ажыратып алдым. Дарханды былай қарай алып кеттім де, балама ұрсып, ескерту жасадым. Содан дүкенге қайтып айналып кірдім де Дарханнан кешірім сұрадым. Сол кезде мен оны сырттай танитынмын, еститінмін. Біздің ауылда менің ағамның досы бар, Дархан сол досының балдызы екен. Мен сол кезде жездеңе хабарласамын дедім, ол керек емес деді. Мен оған: «Жүр сені ауруханаға апарайын, еміңді жасап берейін, ақыңды төлейін, болмаса ішімдігіңді берейін», - дедім. Жездесіне хабарласып едім, жездесі телефонын алмай қойды. Ол ары қарай кеткендей болды», – деді Нұрымов. 

Прокурор Нұрымовқа: «Ол Сіздің кешірім сұрағаныңызға не деп жауап берді?», – деп сұрақ қойды.

«Кешірмеймін деді, балаларды шақырамын деді. Балаң жауап береді, денсаулығын қойып тастайды деді. Мен: «Өз арамызда шешейік, ол кішкентай бала, 16 жаста. Сен өзің шешесінен боқтадың ғой. Боқтамағанда ондай болмайтын еді ғой», – деп қолымнан келгенше кешірім сұрадым. Нұрболдан да, Дарханнан да кешірім сұрадым. Олар кеткен сияқты болды, мен ішке кіріп кеттім. Сосын үйге Шерзаттың анасына хабарласып, мән-жайды түсіндіріп, Нұрғанатты шақырттым. Ол келді. Сол сәтте де бізде төбелес шығару туралы ой болған жоқ. Нұрғанат та Дарханға түсіндіріп айтты. Ол өз жағынан балаларға звондап, шақырып жатты. Оның барлығы видеода бар. Нұрболдың жанында жас бала болды. Нұрбол кішкене мас екен. Ол кім соқты, не болды деп сұрап жатты. Мен балама ашуланып кетпесін деп, мен ұрдым деп айттым. Сол кезде Нұрбол: «Бізді танымайсыңдар ма? Мен Нұрболмын, біз «хуторскийміз», хутордың жігіттерміз», – деді. Кейін ол маған Дарханның жетім бала екенін ескертіп, «неге оны ұрасыңдар?» деп сұрады. Біз оны әдейі ұстап алып ұрған жоқпыз ғой. Нұрбол сол кезде Дарханды балалармен алып кетті. Үшеуі кеткен сияқты болды. Біраздан соң қайта айналып келді. Мен әңгімені басынан бастап айтып бердім. Нұрбол ішке кіріп, тағы төлем жасады да касса жаққа өтіп кетті. Ол менімен дөрекі сөйлесті. Мен Нұрболға тиіскем жоқ, оған жаман сөз айтпадым. Тек дүкеннің ішінде май кесетін пышақ болды. Сол май кесетін пышақты далаға алып шықтым. Неге десеңіз, Дархан Нұрболға дұрыс емес ақпарат жеткізіп тұр. Оның айтуынша, Дархан көшеде сыра ішіп тұрғанда жас бала келіп оны ұрып жіберген. Ол шындығын айтып тұрған жоқ. Ол Дарханның сөзін сөйлеп, бізге келіп тұр. Мен пышақты алып, Дарханға бардым. Балам мен Нұрғанат мені ажыратып алды. Мен Дарханға: «Сен не істеп жатсың? Айттық қой, кешірім сұрадық. Не қалап тұрсың? Денсаулығын қойып тастайды деген не әңгіме? Ол бала емес пе? Жүр, ауруханаға апарайын», - дедім. Балам «қой» деген соң, пышақты ішке қойып, қайта шықтым. Нұрболмен сөйлестік, жас бала (Думан Ысқақ) келді, оған да түсіндірдім. Ол сау болды, оның қылмыс жасайтын әрекеті болған жоқ. Жас бала (Думан Ысқақ) Нұрболға түсіндірді. Ол кезде тағы да кеткендей болды. Бір кезде тағы да айналып келді. Айналып келгенде Нұрқияс болды», – деді Қаржаубай Нұрымов. 

• Тақырыпқа орай: «Аға, маған бір нәрсе сұғып алды» – Сотта Шерзат Полаттың өліміне себеп болған мән-жайлар айтылды

Шерзаттың әкесі оқиғаның ары қарай қалай өрбігенін айтты.

«Дүкеннің алдына қызғылт-сары Accent автокөлігі келді. Одан Дидар Ғалиахмет бауырларымен 3 адам болып түсті. Кейін артынан Мерседес автокөлігі келіп тоқтады. Кейін тағы бір сұр түсті көлік келді, балалар топырлап кеткен соң оны анықтап қарай алмадым. Ол көліктен Равиль шықты. Дархан, Нұрболдар кеткен кезде мен, Шерзат, Нұрғанат үшеуміз дүкеннің ішіне кіріп, сөйлестік. Сол кезде мен балама түсіндірдім, оған кет дедім. Дүкенді жауып кетпек болдық. Нұрғанат дүкенді жауып кеткенде қашқандай боламыз, бұлар үй жаққа барады деп айтты. Нұрғанат Нұрболды сырттай таниды екен. Осы жерде мәселені шешіп кетейік деді. Мен онда бұл іске балам қатыспайды, ол кетсін деп. Балам кеткісі келеген жоқ. Үйге қайтарып жібердім. Біз бастапқы кезде ашумен Дидардың жаныдағы жігіттерге артық сөздер айттық. Жанында жүрген жігіттерге мен кінә тақпаймын. Дидар жайлы іс бойынша айтатын болсам, төбелестің ішінде болды. Бірақ, қандай іс-әрекет жасағанын мен нақты айта алмаймын. Нұрғанат бәрін  таниды екен. Себебі, Нұрғанат пен Равиль, Нұрқияс арасында бұрын кикілжің болған. Кейін Шерзаттың достары келді. Оларды Шерзат шақырды деп ойламаймын. Өйткені олар дүкенге келу керек болған. Мен 102-ге хабарластым, олар телефонды алған жоқ. Сосын 103-ті шақырдым, олар да тұтқаны көтермеді. Оның барлығын тергеуде айттым, барлығы іс материалдарында бар. Сосын мен өзім жедел жәрдемде істейтін болғандықтан, Талғар ауданы бойынша жауапты басшыға хабарластым, ол да алмады. Кейін соңынан барып алған кезде төбелес басталып кетті. Мен оған не айтып жатқанымды өзім түсінбедім. Ары қарай Равиль мен Нұрғанат сөйлесті, менімен бірге дүкенге үш жігіт кірді. Олар сыра аламыз деді, мен дүкенді жабатынымды айттым. Кілтті алайын дегенде соққы тиді, Ахметтің даусы шықты. Сыртқа жүгіріп шығамын дегенде қорғану мақсатында қолыма пышақ алдым. Неге десеңіздер, Нұрбол «хуторскийміз» дегенде біз сескендік. Төбелес тоқтамайды, бұлар өзінікін жасап кетеді деген ой болды. Біз ауылда естіп жатамыз ғой. Бұлар қолдан келсе, бірге-бір шығып әңгіме шешпейді. Олар жабылып, қаншама адам жарақат алған. Көршіміздің өзін сол «хуторскийдің» балалары өлтіріп кеткен. Бәрімізді қорғау мақсатында пышақ алып шықтым. Ол май кесетін пышақ. Есікке жақындаған кезімде бұл жігіттер алдынан шығып кетті үшеуі де. Қыздар да бірге шығып кетті. Есікке жақындаған кезімде Шыңғыс пышақ шығарды. Үстінде жасыл күртешесі, басында кепкасы болды. Пышақ шығарғанда пышағы түсіп қалды. Мен шыға бергенде Азамат есікті тепті, мен ішке қарай құладым. Олардың тұрғанына қарамай, есікті итеріп шыққан кезде Дархан ішіп тырған сырасының шөлмегімен бетімнен ұрды. Мен есеңгіреген кезде артымнан Азамат қызыл кірпішпен жауырынымнан ұрды. Мен сол кезде құлап бара жатқан кезде Шыңғыс пышақпен қуып келді, пышақтың ұшы жауырыныма тиді, мен құладым. Сол сәтте мылтықтың даусы шықты. Мен кімнің атқанын, қалай атқанын көргенім жоқ. Мен жас балаларға қашыңдар дедім. Сол уақытта қарасам, ол жерде анам жүр екен, Шерзаттың анасы жүр екен. Қарасам Нұрғанат Ахметті төбелестің арасынан шығара алмай жатыр екен. шерзат Нұрқияспен, Нұрболмен төбелесіп кетті. Ол видеода көрініп тұр. Сол уақытта мен Абзалдың пышақ тыққанын көрмей қалдым. Бірақ, төбелестің ішінен Абзалды көрдім. Азамат Шерзатқа қарай жүгірді. Шерзат төбелес арасында «Папа, бірдеңе тығып алды, Нұрғанат бірдеңе тығып алды» деп айтып жатты. Шерзатқа қарай Нұрғанат пен Гүлбара бара жатты. Мен анама қарай жүгірдім, анам арыққа құлап қалған. Мен анамды отырғызып, жүгіріп барғанша жаңағыдай жағдайлар болды. Әйелім баласын құшақтап, ұрғызбай жатты. Сол уақытта сөйлеп жатқан баланы Нұрқияс мылтықпен басынан бірнеше рет ұрды. Үйден көршілер шыққанда, бұлар қаша бастады. Машинамды оталдырып келіп қарасам, баланың жүрегі соғып тұрды, Нұрғанаттың да жүрегі соғып тұрды. Екеуі де қансырап жатты, оларды көлікке салып алдым. Ауруханаға жеткізуге асықтым. Жолда кетіп бара жатып мен жылдамдықты асырдым. Сол кезде бала жылжып кетті. Көлікті тоқтатып, қайтадан жатқызайын дегенде балада пульс болмады. Аурухана апардым, екеуін реанимацияға кіргізді», – деді Қаржаубай Нұрымов.