Спорт
Каратэші Әсел Қанай ХХ Азия ойындарының күміс жүлдегері атанды
Каратэден Қазақстан ұлттық құрамасының өкілі Әсел Қанай Жапонияда өтіп жатқан ХХ жазғы Азия ойындарында күміс жүлдеге ие болды.
Астана, NEGE. 61 келіге дейінгі салмақ дәрежесіндегі кумитэ бәсекесінің финалында қазақстандық спортшы Олимпиада жүлдегері, Қытай спортшысы Гун Лиге жол берді.
Жерлесіміз Әсел Қанай ширек финалда Моңғолия өкілі Маралжинго Пуревжавты 9:1 есебімен жеңсе, жартылай финалда Камбоджа спортшысы Чакрия Ванннан 3:0 есебімен басым түсті.
Жапонияда иеленген күміс жүлде Әселдің Азия ойындарындағы жеке көрсеткішін жақсартты. Бұған дейін Ханчжоуда өткен Азия ойындарында ол қола жүлдеге ие болған еді. Осылайша, Әсел Қанай құрлықтық додада бір саты жоғары көтерілді.
Сонымен қатар Әсел Қанай – әлем чемпионатының қола жүлдегері және Азия чемпионы.
Еске салсақ, бұған дейін жекпе-жек шебері Санжар Әділов Жапонияның Айти–Нагоя қалаларында өтіп жатқан XX жазғы Азия ойындарында ММА-ның дәстүрлі стилі бойынша қола жүлдеге ие болып, Қазақстан қоржынына тарихи медаль салған еді.