Қарағандыда қамқорлыққа алған алты баланы ұрып-соққан ерлі-зайыпты сотталды
Қарағандыда асырап алған кәмелетке толмаған алты балаға ауыр дене жарақатын келтірген ерлі-зайыпты мен олардың қызына үкім шықты.
Астана, NEGE. Алты баланы азаптау, оларға ауыр дене жарақатын келтіру, сондай-ақ ірі мөлшерде алаяқтық жасау фактісі бойынша қозғалған қылмыстық іс Қарағанды облысының кәмелетке толмағандар істері жөніндегі мамандандырылған ауданаралық сотында қаралды.
Іс материалдарына сәйкес, ерлі-зайыптыға 2018 жылы ата-ана қамқорлығынсыз қалған алты кәмелетке толмаған баланы патронаттық тәрбиеге беру туралы шарт жасалған.
«Сотталушылар 2018 жылдан 2023 жылға дейінгі ұзақ уақыт аралығында кәмелетке толмағандарға жүйелі түрде физикалық және психологиялық зорлық-зомбылық көрсетіп отырған.
Сонымен қатар сотталушылар Г. және Д. кәмелетке толмаған жәбірленуші Т.-ға ауыр дене жарақатын келтірген, соның салдарынан ол ауруханаға жатқызылған», – делінген сот хабарламасында.
Бұдан бөлек, сотталушы Г. мемлекеттен балаларды асырауға бөлінген қаражатты құмар ойын сайттарында бәс тігуге жұмсаған. Салдарынан мемлекетке 6 264 256 теңге көлемінде залал келген.
Сондай-ақ айыпталушылардың кәмелетке толмаған туған қызы бес баланы күрек сабымен, қамшымен және басқа заттармен ұрып-соғып, оларға дене жарақаттарын келтіргені, психологиялық зорлық-зомбылық көрсеткені анықталған.
«Сотталушылардың кінәсі кәмелетке толмаған жәбірленушілердің, куәлардың жауаптарымен, сараптама қорытындыларымен, сондай-ақ қылмыстық істің басқа да материалдарымен дәлелденеді», – деп хабарлады соттың баспасөз қызметі.
Сот үкімімен Г. 12 жылға, Д. 10 жылға, Б. 4 жыл 8 айға бас бостандығынан айырылды.
Бұған қоса сотталғандардан әрбір жәбірленуші баланың пайдасына келтірілген моральдық зиян үшін 10 млн теңге өтемақы сомасы өндірілді, сондай-ақ Г.-дан мемлекет пайдасына келтірілген залал ретінде 6 264 256 теңге өндірілді.
Сот үкімі заңды күшіне енген жоқ.
Қарқаралы ауданының білім бөлімінің атына жеке қаулы шығарылды.
