Қарағандыда 4 жасар баласының қолын байлап, қалдырып кеткен әйел жазаланды
Қарағандыда әйел адам 4 жасар ұлының қолын байлап, пәтерде жалғыз қалдырып кеткен.
Астана, NEGE. Сот бастапқыда баланы анасымен бірге тұрады деп белгілеп, әкесіне алимент төлеу міндетін жүктеген.
Бір кездесуде әкесі баласының денесінен көгерген іздерді байқайды. Бұдан бөлек, дәрігерлер балада психомоторлық дамудың кешеуілдеуі, сөйлеу қабілетінің нашар дамуы, ауыруы, салмақтың аз болуы және күтімнің жеткіліксіздігі сияқты белгілерді анықтаған.
Тексеру барысында анасы баласының қолын байлап, үйде жалғыз қалдырып кеткені анықталды. Ұзақ жылаған дауысты естіген көршілер есік көзінен баланың қолы байланған күйде артқа бұрылып, жылап, бөлмені айналып жүргенін көрген. Осы оқиғадан кейін сот баланы әкесінің қамқорлығында қалдыру туралы шешім қабылдады.
Қазір сот үкімі күшінде. Баланың анасы Қылмыстық кодекстің 140-бабы 2-бөлігіне сәйкес «Кәмелетке толмаған балаға қатыгездік көрсету» дерегі бойынша кінәлі деп танылды. Сондай-ақ оның ата-аналық құқығы шектеліп, алимент төлеу міндеттелді.
Апелляциялық алқа да бұл шешімді өзгеріссіз қалдырды.
