Қарағанды облысында шенеуніктер бюджеттен 449 млн теңге ұрлап, жеке үй мен «BMW X6» автокөлігін сатып алған
ҚМА Қарағанды облысы бойынша департаменті «Еңбек» РММ филиалының бұрынғы басшыларына қатысты аса ірі көлемде бюджет қаражатын жымқыру фактісі бойынша тергеу жүргізіп жатыр.
Алматы, NEGE. 2021-2023 жылдары РММ және оның аймақтық филиалы «бір көзден сатып алу» әдісімен киім және аяқ киім өндірісіне арналған былғары және трикотаж шикізатын жеткізуге 23 келісім-шарт жасаған. Алайда, тауарлар жеткізілмеген, 449 млн теңге бюджет қаражаты ұрланған.
«Қылмыстық кірісті заңдастыру мақсатында күдіктілер заңмен белгіленген ақшаны қолма-қол айналдыру шегін айналып өтіп, кәсіби ақша жылыстатушының қызметін пайдаланған. Ол ақшаны бөліп, өзінің бақылауындағы 4 жеке кәсіпкердің атынан киім және аяқ киім тігуге арналған тауар жеткізу туралы жалған келісімдер жасаған. Аталған келісімдер мен төлем құжаттары негізінде 122 млн теңге қаражат қолма қол ақшаға айналған», – делінген хабарламада.
Қылмыстық табыстарға Алматы қаласынан жеке үй мен «BMW X6» автокөлігі сатып алынған, оларды тәркілеуден жасыру үшін сенімді тұлғаларға ресімдеген.
Аталған мүлікке соттың санкциясымен тыйым салынды. Күдіктілер 2 айға қамауға алынды.
Қылмыстық іс жүргізу кодексінің 201-бабына сәйкес басқа ақпарат жарияланбайды.
