Қарағанды облысында электр станциясына 8 млн теңге айыппұл салынды
Қарағанды облысындағы «Топар басты тарату электр станциясы» ЖШС-ға жоспарлы тексеру жүргізіліп, нәтижесінде экологиялық талаптарды бұзғаны үшін кәсіпорынға 8 021 492 теңге айыппұл салынды.
Астана, NEGE. Экология департаменті келтірген дерек бойынша, ағынды сулардағы мұнай өнімдерінің мөлшері белгіленген нормативтен 3 еседен артық жоғары болып, яғни 0,169 мг/дм³ құрады. Ал норматив бойынша 0,054 мг/дм³ болуы қажет.
Сондай-ақ экологтар кәсіпорында қалдықтарды жинақтау және сақтау талаптары сақталмағанын анықтады.
«Пайдаланылған майларға арналған герметикалық емес ыдыстардың қолданылуы, май төгінділері, әртүрлі қалдықтарды бірге жинақтау және арнайы белгіленбеген орындарда сақтау фактілері анықталды», – делінген хабарламада.
Тексеру қорытындысы бойынша кәсіпорынға анықталған кемшіліктерді жою туралы нұсқама берілді.