Қарағанды ферроқорытпа зауытында сегіз адам түрлі жарақат алды
![Зауыт](/static/img/plug.jpg)
Қарағанды ферроқорытпа зауытында апат болды. Зардап шеккендерге қажетті медициналық көмек көрсетіліп жатыр.
Алматы, NEGE. 2024 жылдың 20 шілдесінде таңғы сағат 04:10-да YDD Corporation ферроқорытпа зауытында штаттан тыс жағдай орын алды, зардап шеккендерге қажетті медициналық көмек көрсетіледі.
№ 1 пештен кенеттен жалын шығып, нәтижесінде кәсіпорынның 8 жұмысшысы әртүрлі дәрежеде жарақат алды. Қазіргі уақытта зардап шеккен барлық қызметкерлер ауруханада, оларға шұғыл медициналық көмек көрсетіледі.
Компания зардап шеккендерге жан-жақты көмек көрсетуде және аурухананың медициналық қызметкерлерімен үнемі байланыста.
«2024 жылғы 20 шілдеде профессор Х.Ж.Мақажанов атындағы көпсалалы ауруханаға өндірісте алған күйік жарақаттарымен 8 адам жеткізілді. Алты зардап шегуші жансақтау және қарқынды терапия бөліміне, екеуі комбустиология бөліміне жатқызылды. Бес зардап шегушінің жағдайы өте ауыр, екеуінің жағдайы тұрақты, бір пациенттің жағдайы орташа деп бағаланды. Зардап шеккендер бейінді мамандардың бақылауында. Қосымша тексерулер жүргізілді. Пациенттердің барлығы қажетті емді толық көлемде алып жатыр», – деді облыстық денсаулық сақтау басқармасы.