Қапшағайда кафе күзетшілерін аяусыз сабаған төрт полицей жұмыстан қуылды
Алматы облысында полицейлер екі күзетшіні оңдырмай сабап тастады. Қатты соққыдан екеуі де есеңгіреп, Алматыдағы ауруханадан бірақ шыққан.
Алматы, NEGE. Ал жанжалдың шығуына күзетшінің бірінің полицейлерге бар болғаны «кафе жабылады» деп айтқан ескертуі себеп болған. Бірақ бұл демалып отырған тәртіп сақшыларына ұнамай қалған.
Оқиға Қапшағай қаласындағы кафелердің бірінде болған. Кадрда кафе күзетшісін бірден бірнеше еркектің ұрып, тепкілегенін анық көруге болады. Халықтың құқығын қорғап, тыныштығын қамтамасыз етуі тиіс полицейлердің адам шошырлық аяусыз әрекетін көрген Алматы облысының полиция бастығы Серік Күдебаев қоластындағыларды бірден жұмыстан қуды. Және әр адам заң алдында бірдей екенін еске салды.
"Аталған дерек бойынша ҚР ҚК 293 бабы 2 бөлігіне қатысты сотқа дейінгі тергеу амалдары басталды. Оқиғаға қатысушылардың барлығы анықталды. Олардың арасында Қапшағай полция бөлімінің қызметкерлері де болғаны анықталды. Жоғарыда атап өткен қызметкерлердің тікелей басшыларының жауапкершілігі қызметтік тергеу нәтижелері бойынша қарастырылады", – деді Күдебаев.