Қаңтардан бастап Ресейге кіру ережесі қатаңдайды
2025 жылдың 1 қаңтарынан бастап Ресейге кіретін шетелдік азаматтарға қатысты заңнамалық өзгерістер күшіне енді. Осы өзгерістерге сәйкес, Ресейге визасыз кірген шетелдіктердің елде болу мерзімі 90 тәулікке дейін қысқарды. Бұл туралы Қазақстанның Ресейдегі Елшілігі хабарлады.
Алматы, NEGE. Бұған дейін шетелдіктер Ресейге визасыз кіріп, 180 күн ішінде 90 күннен артық бола алмайтын. Алайда енді Ресей Федерациясына визасыз келген азаматтар 90 күннен артық бола алмайды. Елшілік осы өзгерісті түсіндіре отырып, Ресей аумағында жылына 90 тәуліктен астам уақыт бойы оқуға, жұмыс істеуге, уақытша тұруға немесе баспана алуға келген азаматтар үшін қосымша рұқсаттар талап етілетінін атап өтті.
Бұл өзгерістер тек визасыз келген шетелдіктерге қатысты. Визамен келген азаматтардың уақытша болу мерзімі бұрынғыдай сақталады.
Сонымен қатар, Ресей президенті Владимир Путин 2025 жылдың 30 сәуіріне дейін заңсыз мигранттарды елден кетуге міндеттейтін Жарлыққа қол қойды. Қалғысы келетін мигранттар Ресейдің көші-қон қызметінде тіркеліп, биометриялық және медициналық мәліметтерді ұсынуы, орыс тілін білетіндігін және Ресей тарихы мен заңнамасын меңгергендігін растайтын құжаттарды тапсыруы керек. Сондай-ақ, олар тұруға және жұмыс істеуге рұқсат алу үшін қажетті құжаттарды ұсынуы қажет.
Ресей Федерациясының Қорғаныс министрлігімен келісімшартқа отырған шетелдіктерге ерекше жағдай жасалмақ.
