Қаңтар оқиғасы: Археологты өлтірген әскери қызметкер жеті жылға сотталды
Қаңтар оқиғасы кезінде оққа ұшқан археолог Ерлан Жағыпаровтың өліміне кінәлі подполковник 7 жылға бас бостандығынан айырылды.
Алматы, NEGE. 7 ақпанда Ұлттық ұланның 5571 әскери бөлімінің подполковнигі Айтжан Әубәкіровке Алматының әскери соты үкім шығарды.
Сот ісі жабық режимде қаралды. Подполковник Қылмыстық кодекстің 451-бабы «қызметтік өкілеттігін асыра пайдалану» бабы бойынша 7 жылға бас бостандығынан айырылды. Сондай-ақ марқұмның отбасына 30 миллион теңге моральдық шығын өтейді.
Айта кетейік, Қаңтар оқиғасы кезінде 49 жастағы алматылық азамат Ерлан Жағыпаров 6 қаңтарда жоғалып кеткен болатын. Кейіннен оның денесі қолына кісен салынған, аяусыз соққыға жығылған, жүрек тұсынан оқ атылған күйде табылған.