Спорт
Қанат Ислам чемпиондық титулынан айырылды
Қазақстандық боксшы Қанат Ислам (28-0, 22 КО) енді орта салмақтағы «WBO International» белбеуінің иесі емес.
Алматы, NEGE. BoxRec.com сайтының хабарлауынша, белбеу қазір бос. Қанат Ислам 2019 жылдың қазан айында Алматыда намибиялық Уолтер Каутондокваны (18-2, 17 КО) жеңген соң «WBO International» титулына ие болған болатын.
Содан кейін Қанат бір ғана жекпе-жек өткізді. Атап айтқанда, биылғы жылдың ақпан айында Майамиде эквадорлық Джейсон Минданы (14-5-1, 8 КО) нокаутқа түсірді. Бірақ бұл жекпе-жекте Дүниежүзілік бокс ұйымының тұжырымы бойынша «халықаралық» титул бәске тігілген жоқ.
Қанат Ислам келесі жекпе-жегін 21 қаңтарда АҚШ-тың Флорида штатындағы Плант-Сити қаласында өткізеді деп күтілуде. Қарсыластың есімі кейінірек белгілі болады.