John Deere компаниясы Қостанайда ауыл шаруашылығы техникасы өндірісін іске қосады
Үкімет Мемлекет басшысының экономиканы әртараптандыру жөніндегі тапсырмасын жүзеге асыру шеңберінде отандық тауар өндірушілерді қолдау мәселелеріне басымдық беруде. Былтыр отандық өндірісті қолдау мақсатында импорттық тракторлар мен комбайндарды субсидиялаудан бас тарту машина жасау саласын дамытуға үлкен серпін беріп, өндірісті локализациялауға ықпал етті.
Алматы, NEGE. Бұған Қостанай қаласындағы Локализация орталығы базасында америкалық John Deere компаниясының өздігінен жүретін, тіркемелі және аспалы техника өндірісін іске қосу мысал бола алады. Бұл отандық машина жасау саласын дамытудағы және Қазақстанның аграрлық секторына озық технологияларды енгізудегі маңызды қадам болды.
John Deere – ауылшаруашылық техникасын өндіруде әлемдегі көшбасшы кәсіпорын, оның өнімдерін Қазақстанда локализациялау саланы дамытудың негізгі кезеңі болмақ. Өндіріс Agromash зауытының Локализация орталығында іске қосылады. Бұл жоғары өндіріс деңгейі мен техникалық қолдауды қамтамасыз ететін еліміздегі ауыл шаруашылығы техникасы саласындағы ең ірі локализацияланған өнеркәсіп алаңы болып саналады.
John Deere жергілікті өндірісін іске қосу жергілікті жағдайларға бейімделген тракторлар мен комбайндар ассортиментін кеңейтуді, сондай-ақ мемлекеттік қолдау шаралары арқылы оларды сатып алуға қол жеткізуді қоса алғанда, Қазақстан фермерлері үшін жаңа мүмкіндіктер ашу арқылы ауыл шаруашылығы техникасы паркін жаңарту қарқынын жеделдетуге мүмкіндік береді. Қазақстандық ауыл шаруашылығы тауарын өндірушілер отандық өндіріс техникасын қолжетімді шарттар бойынша сатып ала алатынын атап өту маңызды. Президенттің тапсырмасына сәйкес, елімізде жылдық 5%-бен отандық өндірістің ауыл шаруашылығы техникасының жеңілдетілген лизингі бағдарламасы іске қосылды, оған 120 млрд теңге бөлінді.
Биыл 3,2 мың қазақстандық фермер жеңілдетілген лизинг бағдарламасы аясында өз автопарктерін жаңартуға мүмкіндік алады. Agromash зауытының президенті Динара Шүкіжанова елімізде жүргізіліп жатқан саяси және экономикалық реформалардың арқасында америкалық John Deere брендімен өндірістік кооперация құруға мүмкіндік туғанын атап өтті. Осындай жоғары технологиялық жобаларды жүзеге асыру нәтижесінде елімізде жаңа жұмыс орындары ашылып қана қоймай, инновациялық технологияларды енгізуге, инженерлік тұрғыда ойлай алатын жоғары білікті мамандар даярлауға баса назар аударылуда. Жобаны іске асыру экономика, білім беру саласын дамытуға, оның ішінде ауыл шаруашылығында сервистік және салалық мамандарды: агрономдар, инженерлер, механизаторлар және IT мамандар даярлау үшін қосымша ресурстарды инвестициялауға мүмкіндік береді.
Алдағы 5 жылда цифрлық технологияларды енгізу және еліміздің агроөнеркәсіп кешенінің тиімділігін арттыру мақсатында негізгі алаңға айналатын заманауи 3 сервистік орталық салынады.
