Иван Дычконың қарсыласы анықталды
Ауыр салмақ дәрежесіндегі боксшы Иван Дычко 18 желтоқсанда Нұр-Сұлтанда өтетін бокс кешінде кіммен кездесетіні анықталды.
Алматы, NEGE. Дычко кәсіпқой рингте 36 жекпе-жекте жеңіске жетіп, бес рет жеңіліп, тағы бір кездесуін тең нәтижемен аяқтаған ресейлік боксшы Александр Устиновпен кездеседі. Оның еншісінде 27 нокаут бар. Устинов соңғы жекпе-жегін қыркүйекте өткізіп, WBC Азия чемпионы атағы үшін жекпе-жекте украин Владислав Сиренкодан мерзімінен бұрын жеңілген болатын.
Сондай-ақ, биыл наурызда ол Майамиде америкалық Террелл Джамал Вудспен жекпе-жек өткізіп, тең түсті. Ал 2020 жылдың шілдесінде Устинов уақытша WBA Asia титулы үшін жекпе-жекте отандасы Торнике Пуричамиашвилиді жеңді. Сондай-ақ, өз карьерасында Устинов WBA International, WBA Pan African және IBO Inter-Continental титулдарына ие болған.
Ауыр салмақ рейтингінде ресейлік боксшы 59-орында, ал Дычко 101-орында.
