Италияда қазақстандық студент қаза тапты
Ақпаратты Қазақстанның Сыртқы істер министрлігі растады.
Астана, NEGE. Қазақстандық жігіттің қазасы туралы бұған дейін Threads желісінде жазылды. Оның денесі Бриатико қаласындағы жағалаудағы жартастардың арасынан табылған.
Мәліметтерге сәйкес, марқұм Орал қаласындағы Назарбаев зияткерлік мектебінің түлегі болған және Кассино қаласындағы Unicas университетінің үшінші курсында оқып жүрген.
Италиялық БАҚ деректеріне қарағанда, жігіттің денесінен зорлық-зомбылық белгілері анықталмаған. Сарапшылар оның жағалаудағы жартастарға соғылу салдарынан алынған жарақаттарын тіркеген. Алдын ала болжам бойынша, жігіт суға батып, қаза болған. Қайғылы жағдай студенттің денесі табылғанға дейін шамамен 15 сағат бұрын болған деп болжанып отыр.
«Қазақстан Республикасы Сыртқы істер министрлігі марқұмның туған-туыстары мен жақындарына қайғыра көңіл айтады. Біздің елшілік пен Италияның құзыретті органдары оқиғаның мән-жайын анықтап жатыр», – делінген СІМ хабарламасында.
Бұған қоса қазақстандық дипломаттар марқұмның отбасына қажетті консулдық және құқықтық көмек көрсетіп жатқаны хабарланды.
