Испаниядағы су тасқынынан 205 адам қаза болды (видео)
Су тасқынынан көз жұмғандардың көбі Валенсия тұрғындары.
Алматы, NEGE. Валенсия қаласы табиғи апаттан зардап шеккен негізгі аумақ. Мұнда әлі де құтқарушылар жете алмаған аймақтар жетерлік.
BBC NEWS мәліметіне қарасақ, бұл Испаниядағы соңғы 50 жылдағы ең жойқын табиғи апат болып отыр. Сегіз сағат ішінде Испанияда жылдық жауын-шашын мөлшері жауды. Судың және лайдың ағыны жолдарды қиратты, ал көшелер ғимараттар мен көліктердің сынықтарына толы үйінділерге айналды. Елдің инфрақұрылымына жүздеген миллион еуро шығын келтірілді.
Испанияда жоғалғандарды іздеу үшін шамамен 500 әскери қызметкер жұмылдырылған. 75 мыңнан астам үй әлі де жарықсыз отыр. The Guardian тілшісіне зардап шеккендердің бірі жағдай жайлы қысқаша жауап қайтарады.
«Біздің қанша көмек алғанымыз маңызды емес. Қанша көмек болса да, біз үшін аз. Бізге өте көп көмек қажет», – деді Эмбэр Гонсалес.
Қайтыс болған 205 адамның ішінде Валенсияның 202 тұрғыны бар. Еске сала кетсек, бұған дейін су апатынан зардап шеккендер үшін Испания қара жамылып, байрағын төмен түсірген болатын.
