Ирактан 10 бала елге әкелінбек

Алматы, NEGE. «Операция (қазақ балаларын Ирактан әкелу операциясы – ред) әлі жасалған жоқ. Біз ирак тарапымен келіссөз жүргізіп жатырмыз. Сонымен қатар әзірлік жұмыстарын жасау үстіндеміз. Өйткені, бұл балалар елге келген соң, карантинде болады. Ұзақ уақыт бойы қиын жағдайда қалған балаларды оңалтуға, туыстарымен кездестіруге біраз уақыт керек. Жақын арада операция өтеді. Дәл уақыты әлі келісілмеді. Келіссөздерден ешқандай қиындық туып жатқан жоқ, жай ғана ұйымдастыру мәселелері бар. Екі жастан 13 жасқа дейінгі он баланы қайтаруды жоспарлап отырмыз», – деді Смадияров дүйсенбіде өткен брифингте. 

Оның айтуынша, кейбір балалар әкесінен де, шешесінен де айырылған.

«Қазақстанда оларды орналастыратын орын да бар, барлық қажетті нәрселермен қамтамасыз етіледі. Бұған бірнеше мемлекеттік органдар атсалысты. Балаларды қайтару жөніндегі көліссөздер екі аптадан кейін аяқталуы мүмкін», – деді СІМ өкілі.  

Еске сала кетсек, «Жусан» арнайы операциясы барысында Сириядан Қазақстанға 600 адам қайтарылған болатын. Оның 406-сы – балалар. Соның ішінде 10 ер адам мен бес әйел «терорлық ұйымға қосылғаны үшін» бас бостандығынан айырылып, жазаға тартылды. Сонымен қатар Сириядан оралған тағы 14 адамның үстінен сот басталатыны хабарланған еді.