Интернет-алаяқтық: Украинада қазақстандықтарды алдап келген тоғыз адам ұсталды

Астана, NEGE. Қазақстан Ішкі істер министрлігінің хабарлауынша, қылмыстық топ ұзақ уақыт бойы интернет-алаяқтықпен айналысып келген. Алдын ала мәліметтер бойынша, олардың қылмыстық әрекетінен 120-дан астам адамға 85 миллион теңгеден астам материалдық шығын келтірілген.

«Қаскөйлер өздерін байланыс операторларының, банктердің, құқық қорғау органдарының және мемлекеттік құрылымдардың қызметкерлері ретінде таныстырып, азаматтарды смартфондарына зиянды қосымшаларды орнатуға көндірген. Құрылғыларға қашықтан қол жеткізгеннен кейін қылмыскерлер жәбірленушілердің қаражаты мен жеке деректерін жымқырған», – деді ҚР ІІМ киберқылмысқа қарсы іс-қимыл департаментінің бастығы Жандос Сүйінбай.

Арнайы операция аясында жүргізілген тінтулер кезінде екі элиталы автокөлік; 26 компьютер; 49 мобильді құрылғы; сондай-ақ психологиялық ықпал ету бойынша егжей-тегжейлі нұсқаулықтар мен сценарийлер; Қазақстан Республикасының рәміздері тәркіленген.

Нәтижесінде Украинаның тоғыз азаматы ұсталып, уақытша ұстау изоляторына қамалды. Тергеу барысында олардың Қазақстан Республикасы мен басқа мемлекеттердің азаматтарына қатысты интернет-алаяқтықтың өзге де эпизодтарына қатысы бар-жоғын тексеріліп жатыр.