«Хуторские» бандасының басшысы делінген Хасан Қасымбаевқа қатысты тергеу қашан аяқталады?
Бұқаралық ақпарат құралдарында Хасан Қасымбаевқа қатысты тергеу аяқталып, сотқа жолданғаны туралы ақпарат тарап жатыр.
Алматы, NEGE. Алайда Алматы облыстық Полиция департаменті аталмыш ақпаратты жоққа шығарды, деп мәлімдеді Кazinform.
«Бірқатар БАҚ-та Хасан Қасымбаев және басқа да тұлғаларға қатысты қылмыстық істің сотқа жолданғаны туралы шындыққа сәйкес келмейтін ақпарат жарияланды. Аталған қылмыстық іс бойынша тергеу аяқталып, қазіргі уақытта іс материалдары тараптарға танысу үшін ұсынылған. Танысу процесі аяқталғаннан кейін іс айыпталушыларды сотқа беру мәселесін шешу үшін прокуратураға жолданады», – деп хабарлады Алматы облыстық Полиция департаментінің баспасөз қызметінен.
Облыстық сот өкілдері іс материалдары сотқа түспегенін мәлімдеді.
2024 жылдың 2 қарашасында Хасан Қасымбаевтың уақытша ұстау изоляторына қамалғаны белгілі болған еді.
Анықталғандай, ол Шерзат Болаттың өліміне қатысты ұсталмаған. 2021 жылы ережесіз жекпе-жектен жаттықтырушы Арман Әлімовтің денсаулығына қасақана ауыр зиян келтірді және ұрлады деген күдікке ілінген.