«Хуторские»: Атышулы Хасан Қасымбаевтың не себепті ұсталғаны белгілі болды (видео)
Алматы облысының полиция департаменті 2024 жылдың 2 қарашасында Хасан Қасымбаевтың уақытша ұстау изоляторына қамалғанын растады.
Алматы, NEGE. Белгілі болғандай, ол Шерзат Болаттың өліміне қатысты ұсталмаған. 2021 жылы ережесіз жекпе-жектен жаттықтырушы Арман Әлімовтің денсаулығына қасақана ауыр зиян келтірді және ұрлады деген күдікке ілінген. Қылмыс 2021 жылдың 17 маусымында жасалған.
«Қазіргі уақытта қылмыстардың барлық мән-жайын жан-жақты, толық және объективті зерттеуді қамтамасыз ету үшін тергеу әрекеттерінің кешені жүргізіліп жатыр. Іс материалдары бұлтартпау шарасын санкциялау үшін сотқа жіберілді», - делінген хабарламада.
Жәбірленуші Арман Әлімовтің анасы Elmedia порталына берген сұхбатында ұлына Хасанның бұйрығымен шабуыл жасалғанын мәлімдеді. Оның айтуынша, қылмыс орнында Хасан Қасымбаевтың өзі болған.
Естеріңізге сала кетейік, Талғарда 16 жастағы Шерзат Болат бір топ қаскөйдің қолынан қаза тапқан еді. 4 қазанда Талғар қаласындағы төбелесте 16 жастағы Шерзат Болатты ата-анасының көзінше аяусыз өлтірді. Төбелес кезінде Шерзаттың жүрегі мен өкпесіне пышақ сұғылғаны, тепкілеп, басынан мылтықпен ұрғаны айтылып жатыр.
Қылмыстық іс ҚР Ішкі істер министрлігі басшысы мен Бас прокурордың ерекше бақылауында.
