Хорватияда қазақстандық дзюдошылар 6 медаль жеңіп алды
Хорватияда өткен жасөспірімдер арасында Еуропа кубогында қазақстандық дзюдошылар 6 медаль жеңіп алды. Бұл туралы Мәдениет және спорт министрі Асхат Оралов мәлімдеді.
Алматы, NEGE. Еліміздің спортшылары Хорватияның Загреб қаласында өткен жасөспірімдер арасындағы Еуропа кубогында 6 медаль алды. Оның ішінде 2 алтын, 1 күміс және 3 қола. Жалпы медаль есебі бойынша Қазақстан құрамасы 5-ші орынға ие болды.
Турнирге әлемнің 35 елінен 800-ден астам спортшы қатысты. Қазақстан қоржынына Ерхан Мұрат пен Сабина Юлдашева алтын медаль салса, күміс жүлдені Оралбек Байзақ алды. Нұрсұлтан Ысқақов, Еділ Ерболұлы және Досбол Балғабай қола медаль иегерлері атанды.
