Хорватияда президент сайлауы өтіп жатыр
Хорватияда сайлау учаскілері ашылғанын DW.com жаңалықтары хабарлады.
Алматы, NEGE. Хорватияда президенттік лауазым үшін бірнеше үміткер өзара бәсекелесуде. Кандидаттардың арасында елдің қазіргі президенті Зоран Миланович те бар. Сондай-ақ тәуелсіз кандидат ретінде сайлауға педиатр, сот сарапшысы және медициналық генетика саласының маманы Драган Приморак қатысуда.
ТАСС мәліметінше: «Президенттік орын үшін күресте «Мост» саяси партиясының өкілі және Синь қаласының мэрі Миро Буль, тәуелсіз кандидат Томислав Йонич, солшыл саяси партия жетекшісі Ивана Кекин, «Домино» партиясының вице-төрағасы Бранка Лозо, тәуелсіз кандидат Мария Селак Распудич және тағы бір тәуелсіз кандидат Нико Токич Картело да бақтарын сынауда».
DW дереккөзіне сәйкес, егер ешбір кандидат 50%-дан астам дауыс жинай алмаса, сайлаудың екінші кезеңі 2025 жылдың 12 қаңтарында өтеді.
Еуропалық Одаққа мүше бұл Балқан елінде 3,8 миллион азамат дауыс беру құқығына ие екені атап өтілді.
