Хоккейден Қазақстан әйелдер құрамасы бүгін Ұлыбританиямен кездеседі

 Алматы, NEGE. Кездесу Қазақстан уақытымен 00:00-де басталады.

Екі құрама қазірге дейін алты мәрте шеберлік байқасты. Оның төртеуінде қазақстандық хоккейшілер жеңіске жетсе, қалғанында қарсыласына есе жіберді.

Соңғы екі ойында ұлыбританиялықтар басым түсті. Ел құрамасы әлем чемпионатына дайындық аясында өткен жолдастық кездесуде Ұлыбританиядан 1:3 есебімен жеңіліп қалған еді.

Алғашқы екі турдан кейін Италия мен Латвия алты ұпаймен көш басына шықса, Қазақстан үш ұпаймен үздік үштікті түйіндеп тұр. Одан кейінгі орындардағы Оңтүстік Кореяның – 2, Ұлыбританияның – 1, Словенияның – 0 ұпайы бар.

Қазақстан хоккейшілері бұдан кейін 13 сәуірде Латвия, 15 сәуірде Словениямен мұзайдынға шығады.

Ел құрамасы әлем чемпионаты IA дивизионында 2005, 2007, 2009, 2024 жылдарда бақ сынаған еді.