Хоккей: «Барыс» жеңді

Алматы, NEGE.  «Барыс» құрлықтық хоккей лигасында елордада Ресейдің «Витязь» (Подольск) командасын қабылдады.

Екі команда турнир кестесінде қатарлас келеді. Айта кетерлігі, биылғы турнирде «Барыс» соңғы үш кездесуде жеңіске жетті. Ал ресейлік клуб соңғы он кездесудің үшеуінде ғана қарсыластарын қапы қалдырды. Сондықтан екі команда бүгінгі кездесуде алға қарай ұмтылатыны сөзсіз еді.

Ойынның 4-минутында «Витязь» хоккейшісі Линус Линус Хультстрём есеп ашқан еді. Одан кейін 33-минутта әріптесі Каспарс Даугавиньш есепті үстемелей түсті.

«Барыс» сапынан Мэтт Фрэттин 39-минутта есеп айырмасын қысқартты. Ал 44-минутта елордалық Роман Старченко таразы басын теңестірді. Негізгі кезең 2:2 есебімен тең аяқталып, ойын овертаймға ұласты. Овертаймда да жеңімпаз анықталған жоқ. Буллитте «Барыс» жеңіске жетті. Осылайша елордалық клуб төрт ойын қатарынан қарсыластарын қапы қалдырды.

Енді «Барыс» 11 желтоқсанда елордада Ресейдің «Торпедо» (Нижний Новгород) командасын қабылдайды.