Хасан ісі: Куәгерлердің жауабын БАҚ бетінде жариялауға тыйым салынды
Алматы облысы Талғар аудандық сотында Хасан Қасымбаевтың ісі бойынша сот отырысы жалғасты. Бүгінгі сот отырысында жәбірленушілерден және куәгерлерден жауап алынады, деп хабарлайды NEGE тілшісі сот залынан.
Алматы, NEGE. Сот залына БАҚ өкілдері кіргізілмеді. Судья Айнагүл Тукубаева жәбірленушілер мен куәгерлердің айғағын баспасөз бетінде жариялауға тыйым салды. Сол себепті оқиғаның мән-жайы хабарланбайды. Куәгерлер де аты-жөндерін жариялауға қарсылық танытқан.
Бүгінгі сот отырысында жәбірленуші Аюпжан Тажиевтен және 6 куәгерден жауап алынады. Алайда Хасан ісі бойынша жәбірленуші Аюпжан Тажиев сот отырысына келмеді. Сол себепті жәбірленушіні келесі сот отырысына мәжбүрлі түрде қатыстыру ұсынылды.
Бұған дейінгі сот отырысында жәбірленуші Арман Әлімовтен жауап алынып, іске қатысты бейнежазба зерделенген болатын.
Естеріңізге сала кетейік, 2024 жылдың 2 қарашасында Хасан Қасымбаев уақытша ұстау изоляторына қамалды. Ол 2021 жылы ережесіз жекпе-жектен жаттықтырушы Арман Әлімовтің денсаулығына қасақана ауыр зиян келтірді және ұрлады деген күдікке ілінген.
Іс бойынша Х.Қасымбаевтан басқа тағы 5 адам айыпталған. Олар: Руслан Әлиев, Мадияр Қалымжанов, Сайлау Ақтанов, Нұрмұхаммет Сұлтанбеков, Данияр Асқаров.
