Хасан Қасымбаевтың анасы мен жұбайы Тоқаевтан көмек сұрады (видео)
Алматы облысының полиция департаменті 2024 жылдың 2 қарашасында Хасан Қасымбаевты уақытша ұстау изоляторына қамаған болатын.
Алматы, NEGE. Ол 2021 жылы ережесіз жекпе-жектен жаттықтырушы Арман Әлімовтің денсаулығына қасақана ауыр зиян келтірді деген күдікке ілінді.
Бүгін Хасан Қасымбаевтың анасы мен жұбайы видеоүндеу жолдап, тергеу барысында әділдікті талап етті.
«Құрметті Қасым-Жомарт Кемелұлы Тоқаев, менің ұлымның ісін әділетті шешіп беруіңізді сұрап, үндеу жасаймын. Істі өз қарамағыңызға алсаңыз. Баламды жазықсыздан-жазықсыз қаралап отыр. Ешқандай кінәсі жоқ, тергеудің әділ өтуін сұраймын. Жау шабатын болса, Хасан бірінші болып көкірегін тосады», - деді анасы.
Хасан Қасымбаевтың жұбайының айтуынша, әлеуметтік желіде Хасанға қатысты жалған ақпарат көп.
«Ол өзінің шаруашылығын жүргізіп, өзімен-өзі жүрген адам. Кішігірім бетон зауыты бар. Оны танитын адамдарға барыңыздар, оның қандай адам екенін сұраңыздар. Біздің отасқанымызға 15 жыл болды. 3 баланы тәрбиелеп отырмыз», - деді жұбайы.