Дүние
Халықаралық іздеуде жүрген қылмыскер Қазақстанда ұсталды
Батыс Қазақстан облысында республикалық «Мигрант» жедел алдын алу шарасы барысында бес қылмыскер ұсталды.
Алматы, NEGE. БҚО полиция департаментінің ресми өкілі Болатбек Белгібековтің мәлім еткеніндей, 15-19 ақпан аралығында өткізілген аталмыш іс-шара кезінде қолға түскен 5 қылмыскердің біреуі халықаралық іздеуде жүрген болып шықты.
«Оралда ауыр қылмыс жасап, соттан бой тасалаған 35 жастағы өзбекстандық азамат ұсталды. Сондай-ақ облыста заңсыз жүрген 15 шетелдік ел аумағынан шығарылды», – деді Б.Белгібеков.
Полицияның жедел топтары облыс аумағында жүрген мыңнан астам шетелдік азаматты тексерді.
Соның нәтижесінде елде жүріп-тұру мерзімін бұзған 119 адам, шетелдіктің келуіне байланысты құжат жасамаған 96 облыс тұрғыны және шетелдік жұмыс күшін заңсыз тартқан 5 жұмыс беруші анықталып, бәрі де әкімшілік жауапкершілікке тартылды.