Хакерлік шабуыл жасалды
Ресейдің әскери хакерлері Украинаның энергетикалық компаниясының базасынан Хантер Байденге қатысты электрондық хатты ұрламақ болған. Burisma Holdings Ltd энергетикалық компаниясының директорлар кеңесіне мүше болған Хантер
– АҚШ президенті Дональд Трамптың алдағы президент сайлауында бәсекелесі болатын Джо Байденнің ұлы.
Алматы, NEGE. Калифорния штатында орналасқан киберқауіпсіздікпен айналысатын Area 1 Security компаниясының анықтауынша, Burisma компаниясына шабуыл жасағандар ресейлік ГРУ арнайы әскери құрылымының хакерлері. Әлемдік киберқауіпсіздік қызметкерлеріне Fancy Bear деген атпен танымал ресейлік хакерлер тобы 2016 жылғы Америка президентінің сайлауында да АҚШ Демократиялық партиясының ұлттық комитеті серверлеріне шабуыл жасаған.
Бұл шабуылға байланысты Ресей Қарулы күштер министрлігі де, Burisma компаниясының қауіпсіздік қызметі де, АҚШ Қауіпсіздік комитеті де түсінік беруден бас тартып отыр.
