Грузияның бұрынғы президенті Михаил Саакашвили тоғыз жылға бас бостандығынан айырылды
Грузияның бұрынғы президенті Михаил Саакашвилиге 9 миллион лари (шамамен 3,2 миллион доллар) көлеміндегі бюджет қаражатын жымқырды деп айып тағылды.
Алматы, NEGE. Үкімді Тбилиси қалалық соты шығарды. Сонымен қатар, бұл істе Грузияның арнайы күзет қызметінің бұрынғы басшысы Теймураз Джанашия да жауапқа тартылды. Оған қызметтік өкілеттігін асыра пайдаланды деген айып тағылып, 300 мың лари (шамамен 110 мың доллар) көлемінде айыппұл салынды.
Бас бостандығынан айыру мерзімі 2021 жылдың 1 қазанынан бастап есептеледі. Саакашвилиге 3 жыл бойына қандай да бір мемлекеттік қызметте жұмыс істеуге тыйым салынды.
Саясаткерге 2014 жылы мемлекет қаржысын жымқырды деген айып тағылған. Бұл іс Грузияда «пиджак ісі» деген атпен белгілі. Айыптаушы тарап Саакашвили президент кезінде мемлекет қаражатын пиджак, пальто сатып алуға, ұлының оқуына, косметикалық процедуралардан өтуге, қымбат көліктер мен ұшақтарды жалға алуға және қол сағат сатып алуға пайдаланғанын айтады.
Ол 2021 жылдың күзінде Украинадан Грузияға оралған кезде қамалған болатын.
