Грэмми иегері Иманбек «Құрмет» орденімен марапатталды

Астана, NEGE. Бұл туралы ҚР премьер-министрінің орынбасары – мәдениет және ақпарат министрі Аида Балаева әлеуметтік желідегі парақшасында хабарлады.

Республика күніне орай мемлекет басшысы елдің экономикалық және қоғамдық өмірін дамытуға айтарлықтай үлес қосқан азаматтарды марапаттау туралы жарлыққа қол қойған. Алайда олардың кейбірі сол сәтте елден тыс жерде болып, наградаларын уақытылы ала алмаған.

«Бүгін осындай құрметті марапаттарды өз отандастарымызға табыстау мен үшін ерекше мәртебе болды», – деп жазды Аида Балаева Facebook парақшасында.

«Құрмет» орденімен Иманбек Зейкенов қана емес, Конфессияаралық және дінаралық диалог орталығы жанындағы Съездің бастамаларын іске асыру департаментінің бұрынғы басшысы Қарлығаш Қалилаханова да марапатталды.

Сонымен қатар актер Еркебұлан Тоқтар «Қазақстанның еңбек сіңірген қайраткері» атағын алды.