Головкинді үлкен сын күтіп тұр
Matchroom Boxing промоутерлік компаниясының жетекшісі Эдди Хирнорта IBF/IBO нұсқасы бойынша орта салмақтағы әлем чемпионы Генадий Головкин (41-1-1, 36 КО) мен осы санатта WBA Super белбеуінің иегері жапон спортшысы Риота Муратамен (16-2, 13 КО) болатын жекпе-жек туралы айтты.
Алматы, NEGE. «Головкин мен Мурата арасындағы айқас жылдың соңына қарай ұйымдастырылуы мүмкін.
Бұл – әдетте жапондар 31 желтоқсанда өткізетін жекпе-жектің түрі. Біз Мунгиямен де айқас туралы келіссөздер жүргізіп жатырмыз, бұл да керемет кездесу болмақ. Бірақ GGG Муратамен айқасты желтоқсан айында қарастырады деп ойлаймын. Әрине, «Канело» да бұл жекпе-жекті желтоқсан айында нысанаға алады. Алдағы екі аптада не болатынын көрейік», – деп мәлімдеді Хирн IFL.tv-ге берген сұхбатында.
35 жастағы Мурата 2019 жылдың 23 желтоқсанында Йокогамада канадалық Стивен Батлерді (28-3-1, 24 КО) нокаутқа жіберген сәттен бастап шаршы алаңға шыққан жоқ.
Головкин соңғы жекпе-жегін өткен жылдың 18 желтоқсанында АҚШ-та өткізді, онда GGG міндетті қарсыласы поляк боксшысы Камил Шереметаны (21-1, 5 КО) жеңді.
