Головкин World Boxing ұйымының президенті болып сайланды
Қазақстан тарихында алғаш рет отандасымыз олимпиадалық спорт түрі бойынша халықаралық федерацияны басқарғалы отыр. Римде өткен Конгресс кезінде Геннадий Головкин ресми түрде World Boxing ұйымының президенті болып сайланды.
Астана, NEGE. World Boxing – 2023 жылдың сәуірінде құрылған жаңа халықаралық бокс федерациясы. 2024 жылдың қыркүйегінде Головкин осы ұйымның Олимпиадалық комиссиясын басқарды. Ал 2025 жылдың ақпанында Халықаралық Олимпиадалық комитет World Boxing ұйымын уақытша мойындап, боксты әлемдік деңгейде басқару құқығын тапсырды.
«Мен мұнда бокстың болашағы үшін жұмыс істеуге келдім. Біз спортшылар сенетін, Олимпиадалық қауымдастық құрметтейтін федерацияға айналуымыз керек. Әрбір боксшы әділ әрі қауіпсіз спортта өсіп, дамыса деймін. Біз тәуелсіз боламыз, бірақ Олимпиадалық құндылықтарды құрметтеп, әділдік, теңдік және спортшыны қорғау қағидаларына сай жұмыс істейміз», – деді Геннадий Головкин.
Президент Қасым-Жомарт Тоқаев Головкинді жаңа лауазымымен құттықтап, оның еңбегіне жоғары баға берді.
«Бұл – Геннадий Головкиннің ерен еңбегіне берілген лайықты баға. Даңқты отандасымыз олимпиадалық спорт түрі бойынша халықаралық федерацияны басқаратын Қазақстанның алғашқы өкілі атанды», – деп жазды президент.
Головкиннің өкілеттілігі үш жылға созылады.
