Гитлердің туған үйі 800 000 еуроға сатылды
Жыл он екі ай нео-ұлтшылдар тәу етіп жататын, қанішер Адольф Гитлер дүниеге келген үй енді полиция бөлімшесі болатын болды. Бұл жөнінде Рейтер агенттігінің бейнежаңалықтар қызметінде айтылды.
Алматы, NEGE. Браунау-ам-Инн қаласының Salzburger Vorstadt 15 көшесінде орналасқан бұл үй бұған дейін Поммерлер әулетіне тиесілі нысан болып келген. Әуелде қонақ үй болып, кейіннен мүгедектер орталығы ретінде мемлекеттен айына 5 000 еуро көмек алып келген ғимараттың қожайындары жуырда үкіметпен арадағы келісім-шартты бұзған. Олардың бұл әрекетінен қауіп ойлаған Вена билігі үйді Гитлерге табынушы топ иемденіп кетпес үшін, бірнеше мемлекеттік заң да қабылдайды. Ғимараттың қазіргі құнын 800 000 еуроға бағалап, қожайындарынан сатып алған билік, жуырда бұл жерден қалалық полиция бөлімін ашу үшін жүргізілетін қайтаөңдеу жұмыстарына бүкіл Еуроодақ көлемінде конкурс жариялап отыр.
