GGG мен Шайдоров Олимпиадада Софья Самоделкинаны туған күнімен құттықтады
Софья Самоделкинаның Олимпиададағы дебюті туған күнімен тұспа-тұс келді.
Астана, NEGE. Ұлттық Олимпиада комитетінің басшысы Геннадий Головкин мен Олимпиада чемпионы Михаил Шайдоров Милан Олимпиадасында мәнерлеп сырғанаушы Софья Самоделкинаны 19 жасқа толған туған күнімен құттықтады.
Құттықтау сәтінің видеосы Instagram желісінде жарияланды.
Головкин Самоделкинаға гүл шоғын сыйлап, ақыл-кеңесін айтса, Шайдоров оны құшақтап, туған күнімен және Олимпиадада сәтті өнер көрсетуімен құттықтады.
Айта кетейік, биылғы қысқы Олимпиадада мәнерлеп сырғанаудан әйелдер арасындағы сайыста Қазақстан намысын Софья Самоделкина қорғап, жалпы есепте 10-орынды иеленді. Мәнерлеп сырғанаушы қысқа бағдарламадан кейін 12-орында тұрған еді. Еркін бағдарламада Самоделкина төрешілердің шешімімен 138.99 ұпай жинады. Қос бағдарлама қорытындысы бойынша ол 207.46 ұпай еншілеп, жеке рекордын жаңартты.
