Германия кәсіпкерлерге қайтарымсыз 50 млрд еуро бөлді
Германия үкіметі коронавирус салдарынан шығынға ұшыраған кәсіпкерлерге жәрдем беру бағдарламасын бекітті. Билік бұл мақсатқа 50 миллиард еуро бөледі.
Алматы, NEGE. Мәселен, қызметкерлер саны бес адамнан аспайтын фирмаларға 9 мың еуро, ал қызметкерлер саны оннан аспайтын компанияларға 15 мың еуродан бөлінеді.
Бұл қаражат қайтарымсыз, дегенмен, оны алу үшін компания өз шығындарын дәлелдеуі тиіс.
«Бұл көмек – осы бағыттағы алғашқы қадамымыз. Жұмыс орындарының қысқаруы мен фирмалардың күйзелісіне жол бермес үшін бұл қаражатты мүмкіндігінше тез бөлуге ниеттіміз», – дейді Германияның экономика министрі Петер Альтмайер.
Бұнымен қатар кәсіпкерлерге салық жеңілдіктері де қарастырылған. Сондай-ақ олар төмен процентпен несие алуларына болады.
Дегенмен, сарапшылар «орта бизнес саласындағы әрбір оныншы кәсіпорын банкротқа ұшырауы мүмкін» деген болжам жасауда.
Мысалы, Германия экономикасының арқасүйер саласы – автокөлік өндірісінде жүз мыңға жуық жұмыс орны қысқаруы мүмкін. Өйткені пандемия салдарынан көліктерге сұраныс 15%-ке төмендеді.
