Геннадий Головкин Халықаралық бокс даңқы залына қабылданған алғашқы қазақстандық атанды

Астана, NEGE. Ұлттық олимпиада комитетінің хабарлауынша, Геннадий Головкин Халықаралық бокс даңқы залына алғашқы мүмкіндіктен-ақ қабылданды.

Енді оның есімі Мұхаммед Әли, Майк Тайсон, Флойд Мейвезер және Мэнни Пакьяо секілді бокс тарихының ұлы тұлғаларымен қатар аталады.

«Қазақстан тарихында алғаш рет бұл таңдаулы қауымдастықтың мүшесі атанған спортшы Геннадий Головкин болды. Оның спорттағы орасан зор жетістіктері ресми түрде мойындалып, аңызға айналған боксшы әрі өз дәуірінің ең үздік спортшыларының бірі ретіндегі мәртебесін тағы бір мәрте айқындай түсті», – делінген комитет хабарламасында.

Айта кетейік, Геннадий Головкин әуесқой бокста 350 жекпе-жектің 345-інде жеңіске жетсе, кәсіпқой бокста 45 жекпе-жек өткізіп, оның 42-сінде жеңімпаз атанған. Оның 37-сі нокаутпен аяқталған. Спорттық мансабында ол WBA, WBC, IBF және IBO нұсқалары бойынша әлем чемпионы атанды.