Газаға азық-түлік кіргізілмей отыр: Израиль 5 айдан бері гуманитарлық көмекті бөгеп келеді
БҰҰ-ның Палестина босқындарына көмек көрсету агенттігінің (UNRWA) бас комиссары Филипп Лацзарини Израильдің бес айдан астам уақыт бойы Газа секторына гуманитарлық жүктің кіруіне тосқауыл қойып отырғанын мәлімдеді.
Алматы, NEGE. Оның айтуынша, осы кезеңде агенттік пен өзге де үкіметтік емес ұйымдар аймаққа көмек жеткізе алмай келеді.
– Египет пен Иорданиядағы қоймаларымыз азық-түлікке, дәрі-дәрмек пен гигиеналық құралдарға толы. Олар 6 мың жүк көлігін тиеуге жетер еді, – деді ол әлеуметтік желідегі жазбасында.
Лаццарини гуманитарлық көмекті БҰҰ-ның бақылауымен жеткізу қажеттігін атап өтіп, НПО-лардың атына жасалған үндеуге қосылды.
Айта кетейік, қаңтар айында Израиль UNRWA-ның жұмысын тоқтату туралы шешім қабылдаған еді. Соның салдарынан агенттік Газа, Шығыс Иерусалим және Иордан өзенінің Батыс жағалауында қызмет атқара алмай отыр.