Футболдан Қазақстан бірінші лигасында бапкер бас төрешіге су шашып жіберген
Алматылық «Хан-Тәңірі» футбол клубы «Астана М» командасымен кездесу кезіндегі оқиғаға байланысты ішкі қызметтік тексеріс басталғанын хабарлады.
Астана, NEGE. 26 мамырда «Хан-Тәңірі» мен «Астана М» командалары арасындағы матчта жанжал шыққан.
Ойынның 82-минутында «Астана М» командасының ойыншысы Исмаил Мұртаза мен «Хан-Тәңірі» футболшысы Әбілхайыр Әбдірахманов сары қағаз алды.
Осы жағдайдан кейін төреші шешіміне наразылық білдіріп, сөз таластырғаны үшін Әбілхайыр Әбдірахмановқа қызыл қағаз көрсетілді.
Дау-дамай үстінде «Хан-Тәңірі» қызметкері бас төрешіге қолындағы бөтелкедегі суды шашып жіберген.
Клуб өкілдері қызметкердің бұл әрекеті құпталмайтынын және футбол клубы ұстанатын кәсіби этика қағидатына қайшы келетінін атап өтті.
«Клуб Қазақстан футбол федерациясынан, матчтың төрешілер бригадасынан, жарысқа қатысушылардан, жанкүйерлерден және бүкіл футбол қауымдастығынан орын алған жағдай үшін шын жүректен кешірім сұрайды.
Аталған дерек бойынша клуб ішінде қызметтік тексеру басталды», – деп мәлімдеді клубтың баспасөз қызметі.
Сондай-ақ «Хан-Тәңірі» өкілдері тексеру қорытындысы бойынша кінәлі тұлғаларға клубтың ішкі ережелеріне сәйкес қатаң шара қолданылатынын атап өтті. Тіпті қызметкерлермен жасасқан келісімшарт бұзылуы мүмкін екені айтылды.
Еске салсақ, таяуда бұрынғы футбол төрешісі Руслан Дүзмамбетов Қазақстанда футбол арбитрлерінің кәсіподағын құруды ұсынған болатын. Ол бүгінде қазақстандық төрешілер өте күрделі жағдайда жұмыс істеп жүргенін мәлімдеді. Айтуынша, арбитрлер үнемі қысымға тап болып, кәсіби тұрғыда қорғалмай отыр.
