Спорт
Футбол: «Тобыл» өз алаңында «Қайратқа» жол берді
Бүгін футболдан Премьер-лига командалары арасындағы ел біріншілігінің 8-турында алғашқы екі ойынның нәтижесі белгілі болды, деп хабарлайды ҚазАқпарат.
Қостанай, NEGE. Аталған турдағы негізгі кездесудің бірі Қостанайда «Тобыл» мен алматылық «Қайрат» командалары арасында өтті. Екі команда да турнир кестесінде қатарлас келеді. Биыл жүлделі орындардан үміткер. Сондықтан, екеуі де жеңіске жету жолын іздейтіні анық еді.
Ойынның бірінші кезеңінде «Тобыл» сапынан Жаслан Жұмашев 10-минутта есеп ашты. Оған «Қайрат» сапынан Артур Шушеначев 55, Жоао Паоло 73-минутта екі голмен жауап қайырды. Ойынның 90-минутында қостанайлық клубтан Ислам Чесноков таразы басын теңестірсе, 94-минутта «Қайрат» ойыншысы Дмитрий Сергеев қорытынды есепті белгіледі.
Нәтижесінде «Тобыл» қарсыласына 2:3 есебімен жол берді.
Сондай-ақ, «Ақтөбе» мен «Ақсу» (Павлодар облысы) кездесуі аяқталды. Ойын барысында ақтөбелік клубтан Элдер Сантана 11, Арман Кеңесов 56-минутта мергендік танытса, павлодарлық клубтан Тони Сильва 62-минутта көздеген нысанадан мүлт кеткен жоқ. Осылайша, «Ақтөбе» қарсыласынан 2:1 есебімен басым түсті.
Дәл қазір «Астана» мен «Мақтарал» (Түркістан облысы) ойыны өтіп жатыр. Әзірге есеп - 0:0.
Ал, 21:00-де «Ордабасы» (Шымкент) мен «Қайсар» (Қызылорда) шеберлік байқасады.