Францияда автокөліктер өндірісін қолдауға ақша бөлінеді
Франция үкіметі коронавирус індетінен зардап шеккен автокөліктер өндірісі саласына 8 млрд еуро бөлетін болды. Бұл қаражат автокорпорацияларды қолдауға және көлік сатып алатын тұтынушыларға сыйақы төлеуге жұмсалады.
Алматы, NEGE. Президент Эммануэль Макронның мәлімдеуінше, бұл шараның мақсаты компанияларды күйзелістен сақтап қалумен қатар, осы сәтті пайдаланып бүкіл саланы жаңғырту болып отыр. Бұл – 400 мыңдай адам еңбек ететін Франция экономикасының негізгі саласы. Үкімет жоспары бойынша, сыртқы тәуелділіктен құтылып, өз жұмысшыларын қорғап қалу үшін автокорпорациялар бүкіл өндірісін ел аумағына көшіруге тиіс. Сондай-ақ олар экологиялық таза көліктерді шығаруға көңіл бөледі.
"Бес жылда электромобильдер мен гибридтердің жылдық өндірісін бір миллион данаға жеткізіп, экологиялық таза көліктер шығарудан Еуропада алға шығу керек. Бұл автоөндіріс саласының өкілдерімен бірлесіп қабылдаған жоспарымызға кіреді" деді Франция президенті.
