Фонограммаға тыйым салынбайтын болды, бірақ...
Жақында Turkistan халықаралық газетінде «Райымқұлова райынан қайтып қалған жоқ па? немесе өнерпазды кім дейміз елді алдаса» атты мақала жарияланған-ды. Онда қазақ эстрадасындағы кей әншілерінің түрлі дыбыс ұлғайтқышқа арқа сүйеп, сахнада алшаң басып жүргендігі айтылған. Фонограммамен елді алдап, «жұлдыз» болғысы келетіндер қарасы көп екенін жеткізген. Сондай-ақ, тиісті министрлік талайдан сөз етіп, іс жүзінде заң жобасы әзірленбегені сыналады. Аталған мақалаға ҚР Мәдениет және спорт министрінің кеңесшісі Ерлан Жұрынбаев ресми жауап берді. Бұл жайында халықаралық Turkistan апталығы хабарлады.
«Табиғи өнердің тазалығын сақтау, фонограммамен ән айтудың өнерге, тыңдарман талғамына кері әсері туралы мәселені жан-жақты зерделей отырып, сауатты көтерген әрі өте орынды ұсыныстар айтқан басылымға ризашылық білдіреміз. Министр А.Райымқұлова өз сөзінен қайтқан жоқ. Мәдениет және спорт министрлігі бұған дейін мәлімдегендей, өнердегі тазалықты толық қолдайды. Бұл – құрғақ сөз емес», – деді Ерлан Жұрынбаев.
Министрлік өкілінің сөзінше, «Мәдениет туралы» заңға фонограмма мәселесін бақылауға және концерттік бағдарламаларды өткізу бойынша тиісті өзгертулер енгізу туралы заң жобасы әзірленгенге ұқсайды. Фонограммаға тыйым салынбаса да, әншілер онсыз ән сала алмайтындығын мойындау керек.
«Ең алдымен, министрліктің бастамасымен қолданыстағы «Мәдениет туралы» заңға фонограмма мәселесін бақылауға және концерттік бағдарламаларды өткізу бойынша тиісті өзгертулер енгізу туралы заң жобасы әзірленді. Бұл заң жобасында орындаушыларды тыңдармандарға фонограмма қолданатыны жайында ескертуге міндеттеу көзделіп отыр. Ал бұл ескертпелерді құзіретті орган ретінде Мәдениет және спорт министрлігі қабылдайды. Оның ішінде кез келген жарнамалық (афиша, теле-радио бағдарлама) материалдарда фонограмма пайдаланылатыны не пайдаланылмайтыны көрсетілетін болады», – деді министр кеңесшісі.
Сондай-ақ, жаңа заң жобасында әншілердің әдеп ісіне бей-жай қарамауы ескерілген.
«Сонымен қатар аталған жобада этика мәселесіне, орындаушылардың концерт кезінде сахнада өзін-өзі ұстауына қатысты да талаптар бар. Аталған ұсыныстар қазіргі таңда мемлекеттік органдар тарапынан толық қолдау тауып отыр», – деленген ресми хатта.
Бір қуантқаны аталған заң фонограмма қойылатын концерттік бағдарламадағы билет бағасына да әсерін тигізеді, ретке келтіреді. Әнші фонограммада ән салатынын мойындаса, патша көңілді тыңдарман концертке бару немесе бармауды өзі шешеді. Бірақ, фонограммаға тыйым салу мүмкін болмай тұр.
«Ал фонограмманы толық жоюға байланысты кейбір мемлекеттік органдар тарапынан келіспеушілік бар. Дегенмен министр А.Райымқұлованың тікелей бақылауымен осы бағытта заңнамалық мәселелерді реттеу жұмыстары әлі де табанды жүргізіліп жатыр», – дейді Ерлан Жұрынбаев.
